ესპანური “ბარსელონას” ნახევარმცველი ხავი, თავის გუნდში “არსენალის” ჰავბეკ სესკ ფაბრეგასთან ერთად თამაშზე ოცნებობს. როგორც ცნობილია, “მეთოფეთა” კაპიტანი კატალონიური გრანდის საფეხბურთო აკადემიის აღზრდილია და ლონდონში 16 წლის ასაკში გადავიდა. “ბარსას” ხელმძღვანელობა ნიჭიერი ახალგაზრდა ფეხბურთელის უკან დაბრუნებაზე უკვე დიდი ხანია ფიქრობს. ხავის კი არაერთხელ აღუნიშნავს, რომ ესპანეთის ნაკრებში იგი ჩინებულად გრძნობს თავს ფაბრეგასთან ერთად. “იმედი მაქვს, რომ სესკი ჩვენთან გადმოვა. “ბარსა” მის გენებშია, ხოლო “არსენალში” იგი სხვა ფეხბურთელებთან შედარებით თავის უპირატესობას ავლენს. მის გვერდიგვერდ თამაში მსურს, რადგან ესპანეთის ნაკრებში ძალიან კარგად ვუგებთ ერთმანეთს. თუმცა ზოგიერთის მოსაზრებით, ჩვენ ერთად ასპარეზობა არ შეგვიძლია. ვიმეორებ, უბრალოდ დიდებული იქნებოდა, სესკი “ბარსაში” რომ გადმოსულიყო. ეს მხოლოდ მისი კარიერის დასაწყისია და ვფიქრობ, ფაბრეგასის მომავალი “ბარსელონასთან” იქნება დაკავშირებული”, - ავრცელებს ხავის კომენტარს Eurosport-ი.
